يا تري تعرف أية عن .. :: الفنون العسكرية في الاسلام :: ..

المشرف المساهمات : 41 تاريخ التسجيل : 22/02/2008

السلام عليكم و رحمة الله و بركاته

انت قرأت كتير عن الجهاد ..اسبابه ..انواعه .. اصوله في الكتاب و السنه ..وحتي اسماء بعض المعارك المشهورة ... بس عمرك قرأت تفاصيل معركة كأنك بتسمع فيها السيوف و الخيل و تشوف التكتيكات و امتي انسحبواو امتي انكسروا و امتي هاجمواو ازاي انتصرنا

انت سمعت كتير عن معارك فتح فارس و الشام و مصرو الاندلس .. لكن عمرك سمعت عن معارك فتح ماوراء النهرين و بلاد افريقية شمالها و جنوبها و شمال الشام و القسطنطينية

انت سمعت ان هارون الرشيد كان بياخد الجزية من ملكة الروم وبعده من نقفور كلب الروم ...
بس تعرف ده ابتدي امتي .. و انتهي لية و ازاي

تعرف ازاي العرب كانوا بيصنعوا السيوف يعني- فن صناعة السيوف-
ازاي كانوا بيستخدموها ...... مش ممكن انهم كانوا بيمسكوا حتة حديدة لها سن ويطعنوا بيها العدو وخلاص..اية انواعها اية اسمائها اية اشهرها .. و ازاي كانوا بيستخدموها اية اساليب الطعن و المبارزة

ياتري تعرف اسماء اللي خرجوا للمبارزة في المعارك و لية و عملوا اية

ياتري تعرف اسماء الخيل العربية اللي كانت تحت الفرسان و لية كانوا بيتغنوا بالشعر فيها

ياتري تعرف كانت اية تكتيكات المعارك الاسلامية و شكل الاراضي اللي حصلت عليها و كانت كام يوم و هل كل الايام كانت لينا و لا فيه ايام كانت علينا

علي العموم الفايدة من ورا الموضوع كبيرة

ممكن تكون حافز لينا او حتي لأولادنا لو علمناهم التاريخ ده ..

و اللي خلاني ابتدي الموضوع اني وقع تحت ايدى كتاب اسمه " الفن العسكري الأسلامي "

تأليف:العميد الركن ياسين سويد
الناشر: شركة المطبوعات للتوزيع والنشر
تاريخ النشر: 01/01/1990

ان شاء الله هاشارك بنقل بعض من الجهد اللي كان فيه

أرجوكم لو فية حد يعرف عن موضوع فن و تكتيكات الحرب عند المسلمين يشاركنا

انا سمعت عن كتب في مكتبة دبلن في ايرلندا بتحكي عن تاريخ الفروسية و فنون الحرب الاسلامية و في مكتبات انجلترا و الكونجرس الامريكي و فرنسا

سمعت عن مخطوطات هناك محتاجة حد يحققها و يعيد كتابتها و نفسي ييجي اليوم اللي اقدر اقراها لاولادي بكل فخر

انا سمعت عن مخطوطات في تركيا و الصين و الهند ماحدش عارف عنها حاجة ترجموها للغتهم هم و احنا هنا مش عارفين حاجة

ماحدش يعرف يروح الاماكن دي و يدخل و ينشرها لينا و له الثواب

زمان الطبيب برزويه و بأمر من كسري انوشروان راح اشتغل في مكتبة ملك من ملوك الهند علشان ينسخ كتاب" كليلة ودمنة" .. و ده كان كتاب الملوك بيتوارثوه مش مسموح لحد من الرعية انه يقراه و السبب انه كتاب فية حكمة اجيال من الملوك و تراث شعب بيفخر بيه الملوك

علي العموم انا عايز اشوف ارائكم قبل ما نبتدي

السلام عليكم و رحمة الله و بركاته